ERG Қазақстандағы ірі «жасыл» энергетика жобаларының бірі – «Хромтау» ЖЭС құрылысын аяқтады

Eurasian Resources Group (ERG) қуаты – 150 мегаватт «Хромтау» жел электр станциясындағы 24 турбинаның барлығын орнатып бітті. Бұл – Ақтөбе облысындағы жаңартылатын энергетиканың көшбасшы жобасы және Топтың ESG стратегиясының маңызды тармағы. ««Хромтау» ЖЭС – жаңартылатын энергия көздерінің үлесін арттыру қамындағы ұлттық мақсатқа қосқан елеулі үлесіміз, – деп атап айтты ERG Директорлар кеңесінің төрағасы, Бас атқарушы директоры Шухрат Ибрагимов. – Жобаны ERG Capital Projects компаниясы Қазақстанның Даму Банкінің қаржылық қолдауымен іске асырды. Құрылысқа құйылған инвестиция көлемі – 74 миллиард теңгеден асты».

ESG күн тәртібі – бұрыннан бері ERG миссиясының негізгі тармағы. 2023 жылы Топ Декарбонизация стратегиясын әзірледі. Ол Дубайда өткен COP28 Бүкіләлемдік климат саммитінде таныстырылған.

Қазір Стратегия аясында жалпы инвестиция көлемі 300 млн АҚШ долларын құрайтын жобалар жүзеге асырылуда. Темір кені дивизионында Қашар жылу орталығы газға ауыстырылды, Алюминий дивизионында – буды тұтынуды азайту бағдарламасы енгізілуде, жаңа кальцинация пештері мен глинозем өндірісін жетілдіру жұмыстары жүріп жатыр. Сондай-ақ, Ақтөбе ферроқорытпа зауытында қайталама энергия ресурстарын электрге айналдыратын утилизациялық станция салынып жатыр. Ал Стратегияны жүзеге асырудағы жаңа кезең әрі қазақстандық металлургияның дамуының маңызды қадамы – «Хромтау» ЖЭС-ын іске қосу.

Облыс әкімі Асхат Шахаров энергетикалық нысанның ел экономикасы үшін маңыздылығына тоқталып, Мемлекет басшысының  өңірге инвестиция тарту тапсырмасы жүйелі түрде орындалып келе жатқанын жеткізді. 

- Елімізге инвестиция тарту – Президент Қасым-Жомарт Кемелұлының «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында қойылған басты міндеттердің бірі. Ақтөбе облысы – инвестицияларға, инновацияларға және заманауи өндірістерге әрқашан ашық, экономикасы қарқынды дамып келе жатқан өңір. Мемлекет басшысының тапсырмасын орындай отырып, өңірде негізгі капиталға салынған инвестиция көлемі жыл басынан бері 590,1 миллиард теңгеге жетіп, өткен жылдың осы кезеңімен салыстырғанда 52,7%-ға артты. Бұл көрсеткіштер өңірдің жоғары инвестициялық әлеуетін және бизнес тарапынан сенімнің артып отырғанын айқын дәлелдейді. Ал «Хромтау» жел электр станциясы жобасын жүзеге асыру аясында 25 жаңа жұмыс орны ашылады, - деп атап өтті өңір басшысы Асхат Шахаров.

ЖЭС «Қазхром» ТҰК» АҚ құрамындағы Дөн тау-кен байыту комбинатының маңында салынды. Енді ERG Энергетика дивизионына кіретін болады. 2024 жылдың желтоқсанында алғашқы екі қондырғы электр қуатын өндіре бастады. 2025 жылдың 1 қаңтарында алғашқы миллион киловатт-сағат өндірілді. Ал бүгінде барлық турбиналардың монтажы толық аяқталған. Мұндай қарқын кәсіби команда мен жобаға қатысушылардың үйлесімді жұмысының арқасында мүмкін болды.

Қуаты 150 мегаватт «Хромтау» ЖЭС жылына 500 миллионнан астам киловатт-сағат «жасыл» энергия өндіреді. Жыл сайын станция 440 мың тоннаға дейін көмірқышқыл газын атмосфераға шығарудан сақтап, 300 мың тоннадан астам көмірді үнемдеуге мүмкіндік береді.

– ERG әрқашан ESG қағидаттарына сүйеніп жұмыс істейді. «Хромтау» ЖЭС жобасы – біздің Стратегиямыздың заңды жалғасы. Бұл – Топтағы алғашқы жел энергетика жобасы және ол әлдеқашан «жасыл» энергияға көшу символына айналды, – деді Шухрат Ибрагимов. – ERG өндіретін қазақстандық хром жоғары сапасымен әлемде танылған. Енді біз оны экологиялық тұрғыдан таза ете отырып, бәсекеге одан да қабілетті етеміз. Осылайша, ERG металлургияны орнықты болашақтың ажырамас бөлігіне айналдырады.

– Қазақстан Даму Банкі жаңартылатын энергетика саласындағы жобаларды қаржыландыруға басымдық береді. Біз елдің декарбонизация мақсаттарына және энергетикалық қауіпсіздігін қамтамасыз етуге үлес қосатын жаңа генерация көздерінің құрылысын қолдаймыз. «Хромтау» ЖЭС қаржыландыру – даму институттары мен бизнес бірігіп, Қазақстанның «жасыл» экономикасының негізін қалайтын ауқымды жобаларды жүзеге асырып жатқанының айқын дәлелі, – деді Қазақстанның Даму Банкі Басқарма төрағасы Марат Елибаев.

ERG «жасыл» генерация жобаларын дамытуын жалғастыруда. Декарбонизация стратегиясы аясында Топ орта мерзімді мақсат ретінде негізгі өнімдердің – алюминийдің, ферроқорытпа мен темір кені шекемтастарының көміртегі ізін 30%-ға қысқартуды көздеп отыр.

«Хромтау» жел электр станциясының видеосы сілтемеде

ERG-дің тыныс-тіршілігі жайлы толымды ақпарат  ресми телеграм-арнамызда